Suðurland
  • 2076

Mosfellskirkja

Grímsneshreppur, Árnessýslu

Byggingarár: 1847-1848.

Hönnuður: Bjarni Jónsson forsmiður.[1]

Breytingar: Turn smíðaður á kirkjuna 1866 og loft yfir fremri hluta framkirkju og hvelfing yfir innri hluta framkirkju og kór. Hönnuður: Guðmundur Þórðarson forsmiður.[2]

Árið 1948 var forkirkja þiljuð af framkirkju.[3]

Friðuð í A-flokki af menntamálaráðherra 20. desember 1982 samkvæmt 1. mgr. 26. gr. og 27. gr. þjóðminjalaga nr. 52/1969.[4]

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

 

Mosfellskirkja er timburhús, 10,13 m að lengd og 5,07 m á breidd. Þak er krossreist og upp af vesturstafni er turn með risþak. Bogadregin hljómop með hlera eru á þremur turnhliðum. Á hvorri hlið kirkju eru þrír póstagluggar með tveimur sex rúðu römmum en einn heldur minni á framstafni. Kirkjan er klædd listaþili, þök bárujárni og stendur hún á steinsteyptum sökkli. Fyrir kirkjudyrum eru vængjahurðir með okum og spjaldsett innri hurð og strikuð brík yfir.

Forkirkja er yfir þvera kirkju stúkuð af framkirkju með þverþili. Skrúðaskápur er í henni sunnan megin en stigi til loftsins norðan megin. Á þverþilinu eru vængjahurðir að framkirkju, gangur inn af þeim en bekkir hvorum megin hans. Kórþil er í baki innstu bekkja sem klætt er niður í gólf og veggbekkir umhverfis í kór að altari. Veggir eru klæddir spjaldaþiljum en í þverþili er krossviður. Yfir fremri hluta kirkjunnar er afþiljað loft á bitum en reitaskipt hvelfing yfir innri hluta og strikasylla undir.



[1] ÞÍ. Bps. C. V, 69 B. Bréf 1849. Byggingarreikningur Mosfellskirkju 1847-1848 ásamt fylgiskjölum.

[2] ÞÍ. Bps. C. V, 70 B. Bréf 1867. Reikningur yfir aðgjörð Mosfellskirkju árið 1866. Lýsing á framkvæmdum við Mosfellskirkju 1866.

[3] ÞÍ. Árnesprófastsdæmi AA/12. Mosfell 1951; Guðmundur L. Hafsteinsson. Kirkjur Íslands 3. Mosfellskirkja, 110-125. Reykjavík 2002.

[4] Húsafriðunarnefnd. Skjalasafn. Friðunarskjal Mosfellskirkju.