Suðurland
  • 1398

Stokkseyrarkirkja

Stokkseyri

Byggingarár: 1886.

Hönnuður: Jón Þórhallason forsmiður.[1]

Breytingar: Mikið breytt að innri gerð 1963-1964. Hönnuður: Sigurður Sigurðsson húsasmíðameistari frá Götuhúsum.[2]

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

 

Stokkseyrarkirkja er timburhús, 12,69 m að lengd og 7,63 m á breidd, með kór undir minna formi, 3,82 m að lengd og 3,84 m á breidd. Þak kirkju er krossreist og upp af vesturstafni er ferstrendur turn með risþak og mjór stallur undir. Kirkjan er bárujárnsklædd og stendur á steinsteyptum sökkli. Á hvorri hlið kirkju eru fjórir gluggar með T-laga póstum og einn á hvorri hlið kórs. Í þeim eru tveir þriggja rúðu rammar undir þverpósti en þverrammi að ofan með bogarimum. Á framstafni yfir dyrum eru þrír sex rúðu póstagluggar, miðglugginn er sjónarmun stærri en hinir tveir. Fyrir kirkjudyrum eru spjaldsettar vængjahurðir og þvergluggi yfir með bogarimum.

Forkirkja er yfir þvera kirkju skilin frá framkirkju með þverþili. Í henni sunnan megin er skrúðhús en norðan megin er geymsla, salerni og stigi til sönglofts yfir forkirkju og fremsta hluta framkirkju og setsvala inn með hliðum. Að framkirkju eru vængjahurðir af einföldustu gerð og gangur inn af þeim og stólaraðir hvorum megin hans. Kór er hafinn yfir kirkjugólf um tvö þrep. Veggir forkirkju eru klæddir krossviðarplötum en framkirkja og kór klædd gullálmsplötum. Reitaskipt hvelfing er yfir framkirkju og önnur minni yfir kór.



[1] Hörður Ágústsson. Íslensk byggingararfleifð I, 223. Reykjavík 2000.

[2] Árnesprófastsdæmi. Vísitasíubók 1955-. Stokkseyri 1971; ÞÍ. Bps. 1994-AA/10. Stokkseyri 1982; Guðmundur L. Hafsteinsson. Kirkjur Íslands 4. Stokkseyrarkirkja, 122-134. Reykjavík 2003.