Árneskirkja, Trékyllisvík

Hönnuður: Magnús Gunnlaugsson forsmiður.

Saga

Árneskirkju er fyrst getið í Kirknatali Páls Jónssonar biskups frá því um 1200. Kirkjan var reist í stað torfkirkju sem var að falli komin samkvæmt úttekt árið 1849. Árið 1991 var ný kirkja vígð í Árnesi og stendur hún gegnt gömlu kirkjunni, hinum megin við þjóðveginn.

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Lýsing

Árneskirkja er timburhús, 9,20 m að lengd og 4,98 m á breidd. Þakið er krossreist og upp af framstafni er ferstrendur turn með píramítaþaki. Kirkjan er klædd listaþili en þök bárujárni. Hún stendur á steinhlöðnum sökkli og er stöguð niður á hornum og miðri suðurhlið. Á hvorri hlið kirkju eru þrír bogadregnir smárúðóttir gluggar, einn minni ofarlega á kórbaki en fjögurra rúðu krosspóstagluggi á framstafni. Bogadregið hljómop með hlera fyrir er á framhlið turns. Fyrir kirkjudyrum eru tvöfaldar vængjahurðir og um þær skoraðar flatsúlur og bjór yfir.

Inn af kirkjudyrum er gangur og þverbekkir hvorum megin hans en veggbekkir umhverfis í kór. Setuloft á bitum og sex stoðum er yfir framkirkju og sveigður stigi í suðvesturhorni. Veggir eru klæddir spjaldaþili og efst á veggjum í kór er strikasylla sem leidd er inn á kórgafl og frambrún setulofts. Í fremsta stafgólfi á kirkjulofti er opið upp í turninn. Veggir á setulofti eru klæddir strikuðum panelborðum. Yfir því er panelklætt risloft en bogadregið efst undir mæni. Yfir kór er reitaskipt risloft og lágboga hvelfing efst undir mæni.

Heimild