Kaldrananeskirkja, Kaldrananesi við Bjarnafjörð

Hönnuður: Jóhann Vilhelm Grundtvig forsmiður.

Saga

Kaldrananeskirkju er fyrst getið í kirknatali Páls Jónssonar Skálholtsbiskups frá um 1200. Kirkjan var upphaflega og allt til ársins 1950 bændakirkja, en þá tók söfnuðurinn við henni. Í máldaga kirkjunnar frá um 1317 segir að kirkjan hafi verið helguð Maríu guðsmóður, Mikjál erkiengli og hinum helga Þorláki. Núverandi kirkja var reist á grunni eldri kirkju árið 1851.

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Lýsing

Kaldrananeskirkja er timburhús, 10,36 m að lengd og 4,61 m á breidd. Þakið er krossreist og klætt bárujárni og upp af framstafni er ferstrendur turn með risþaki. Tígulgluggi á framhlið turns og lítið hljómop á hvorri turnhlið. Kirkjan er klædd listaþili og stendur á steinsteyptum sökkli. Á hvorri hlið kirkju eru þrír póstgluggar með tveimur þriggja rúðu römmum og einn heldur minni á framstafni. Kvistgluggi er í suðurþekju uppi yfir miðglugga. Fyrir kirkjudyrum er spjaldsett hurð og stórskorin brík yfir og flatsúlur hvorum megin dyra.

Inn af kirkjudyrum er gangur og þverbekkir með rimlum í baki hvorum megin hans en bekkir umhverfis í kór. Loft á bitum er yfir tveimur fremstu stafgólfum framkirkju og stigi við vesturgafl sunnan megin. Innst á loftinu er þil og á því op með ferstrendum rimlum fyrir. Veggir eru klæddir spjaldaþili. Yfir innri hluta framkirkju er reitaskipt risloft en yfir kór reitskipt hvelfing prýdd stjörnum.

Heimild