Óvæntur fornleifafundur

Frá því í nóvember á síðasta ári hafa miklar framkvæmdir verið í kjallara aðalskrifstofu Minjastofnunar á Suðurgötu 39 í Reykjavík. Í ljós kom leynd mygla í stórum hluta rýmisins, rífa þurfti allt innan úr kjallaranum, komast fyrir mygluna og að lokum endurinnrétta. Nú er sú vinna komin vel á veg. Ákveðið var að nýta tækifærið og opna á milli tveggja rýma í suðurenda hússins með því að setja þar dyr. Við þá vinnu kom í ljós gömul hurð, líklega upprunaleg, sem lokað hefur verið og klætt yfir. Allt bendir til þess að þessi breyting á rýminu hafi átt sér stað um eða rétt fyrir 1972, en þá flutti Sjálfstæðisflokkurinn úr húsinu og því var breytt í barnaheimili. Sjálfstæðisflokkurinn hafði bækistöðvar sínar í húsinu frá 1956, enda þekkja margir það undir heitinu Valhöll, og höfðu Heimdellingar m.a. sína aðstöðu í kjallaranum á tímabili. Tímasetning þessara breytinga er metin út frá miða sem fannst á hurðinni sem falin var inni í veggnum:

„Bannað að opna hurðina. Hér eru kommar. As everywhere“. 

Af rithöndunum að dæma hafa hér þrír einstaklingar átt hlut að máli. Líklega hefur nú fyrsti hlutinn verið skrifaður af ráðsettum aðila í húsinu, en spurning hvort Heimdellingar hafi átt heiðurinn að seinni tveimur athugasemdunum. Kannast einhver við það að eiga þessar fleygu athugasemdir? Og af hverju var bannað að opna þessa hurð?